सिलगढी नगरनिगमको वार्ड नम्बर 14 की काउन्सिलर श्रावणी दत्तालाई वार्डवासीसँगको विवादका कारण मेयर परिषद पदबाट निष्कासित गरिएको छ। काउन्सिलर श्रावणी दत्तामाथि गम्भीर आरोप लागेपछि मेयर गौतम देवले सोमबार आयोजित पत्रकार सम्मेलनमा श्रावणी दत्तालाई तत्काल नगरनिगमको मेयर परिषदबाट हटाइएको घोषणा गरे।
उल्लेखनीय छ, गत आइतबार राति गणेश पूजा विसर्जनपछि मदिरा सेवन गरी श्रावणी दत्ता र उनकी छोरी विरुद्ध आक्रमण, दुर्व्यवहार र हंगामा मच्चाएको आरोप लागेपछि यो कदम चालिएको हो। उक्त क्षेत्रकी एक महिलाले काउन्सिलरले मादक पदार्थ सेवन गरी आफ्नो दोकानमा पुगेर आफ्ना पतिसँग दुर्व्यवहार गरेको र झगडा गरेको आरोप लगाएकी थिइन्। यो घटनापछि क्षेत्रमा तनावको परिवेश उत्पन्न बनेको थियो।
स्थानीयहरूले घटनाप्रति असन्तुष्टि व्यक्त गर्दै जनप्रतिनिधिको यस्तो व्यवहार स्वीकार्य नभएको र त्यस्तो व्यक्तिलाई पदमा बस्ने अधिकार नभएको बताएका थिए। 
अर्कोतर्फ, काउन्सिलर श्रावणी दत्ताले यी सबै आरोपहरूलाई निराधार रहेको बताएकी थिइन्। उनले यो सबै आफ्नो छवि बिगार्ने षड्यन्त्र भएको आरोप लगाउँदै यदि यस विषयमा निष्पक्ष रूपमा अनुसन्धान गरिएन भने, भोक हडतालमा बस्ने चेतावनीसमेत दिएकी थिइन्। 
यसैबीच तर सोमबार पत्रकार सम्मेलनमा मेयर देवले स्पष्ट रूपमा नगरनिगमले कुनै पनि जनप्रतिनिधिको त्यस्तो गतिविधिलाई सहने छैन, जसले संस्थाको गरिमामा प्रश्न उठाउँछ भनी बताए। 
मेयरले श्रावणी दत्त विरुद्धको आरोपको गहन अनुसन्धान गरिने, तर प्राथमिक तहमा बाहिर आएका गुनासो र तथ्यहरूलाई ध्यानमा राख्दै उनलाई मेयर परिषदबाट हटाउनु आवश्यक रहेको बताएका छन्। 
मेयरले अहिलेका लागि त्यो कार्यालयको जिम्मेवारी अर्को मेयर काउन्सिलरलाई सुम्पिएको पनि बताए। साथै, वार्डवासीहरूको गुनासोको छानबिन गरेर आवश्यक परेमा भविष्यमा थप कदम चालिने पनि जनाएका छन्। 
अर्कोतिर मेयरको निर्णयपछि, स्थानीय जनताले यस कदमलाई स्वागत गर्दै प्रशासनले सही समयमा सही निर्णय गरेको बताएका छन् भने श्रावणी दत्तका समर्थकहरूले यो निर्णय हतारमा गरिएको आरोप लगाएका छन् ।