अरुणाचल प्रदेशको जिरो उपत्यकामा जारी जिरो संगीत महोत्सवको तेस्रो दिन शनिबारको कार्यक्रममा सिक्किमका मुख्यमन्त्री प्रेमसिंह तमाङ (गोले) ले आधिकारिक सहभागिता जनाए। कार्यक्रममा अरुणाचल प्रदेशका मुख्यमन्त्री पेमा खाण्डु र उपमुख्यमन्त्री चौना मेन पनि उपस्थित थिए।
उत्सवमा पहिलोपटक सिक्किम राज्य साझेदारको रूपमा सहभागी बनेको छ जसले दुई राज्यबीचको सांस्कृतिक आदानप्रदानलाई प्रोत्साहन गर्दै आपसी सम्बन्धलाई अझ मजबुत बनाएको छ।
कार्यक्रममा सम्बोधन गर्दै सिक्किमका मुख्यमन्त्री गोलेले सफलतापूर्वक सम्पन्न जिरो संगीत महोत्सवका लागि अरुणाचल प्रदेशलाई बधाई दिए। उनले सिक्किम र अरुणाचल प्रदेशबीचको सांस्कृतिक र भौगोलिक समानतालाई जोड दिँदै दुवै राज्यबीच आदानप्रदान कार्यक्रम शुरु गर्ने प्रस्ताव राखे। साथै, घरेलु पर्यटन प्रवर्द्धन र आपसी सम्बन्धलाई अझ प्रगाढ बनाउनुपर्नेमा जोड दिए।
मुख्यमन्त्रीले सिक्किमबाट सहभागी भएका 200 भन्दा बढी प्रतिनिधिलाई महोत्सवबाट विशेष कुरा सिक्न र ‘Vocal for Local’ अभियानलाई अघि बढाउन प्रोत्साहित गरे। उनले महोत्सवप्रति प्रशंसा व्यक्त गर्दै आगामी दिनहरूमा यसलाई अझ भव्य र सफल बनाउन शुभकामना दिए।
विश्व पर्यटन दिवसको सन्दर्भमा उनले सिक्किमसहित सम्पूर्ण उत्तर–पूर्वी राज्यहरूले पर्यटन क्षेत्रका हितमा परस्पर सहयोग र सहकार्य गर्नुपर्ने आवश्यकता औंल्याए।
सिक्किम र अरुणाचल प्रदेशका स्थानीय उत्पादन तथा खाद्य सामग्री प्रदर्शनीमा उनले भ्रमण गर्दै स्वयं सहायता समूह र उद्यमीहरूसँग अन्तर्क्रिया गरे। साथै, विभिन्न कला प्रदर्शनी, कार्यशाला र सङ्गीतात्मक प्रस्तुति अवलोकन गर्दै जनसाधारणसँग अन्तर्क्रिया पनि प्रकट गरे।
मैत्री र सद्भावको प्रतीकस्वरूप सिक्किमका मुख्यमन्त्री प्रेमसिंह तमाङ र अरुणाचल प्रदेशका मुख्यमन्त्री पेमा खाण्डुले एक–अर्कासँग फूल र स्मृति चिन्ह आदानप्रदान गरे।
सिक्किमको प्रतिनिधि मण्डलमा उद्योग तथा वाणिज्य, पर्यटन तथा नागरिक उड्डयन विभागका मन्त्री छिरिङ थेनडुप भोटिया, विद्युत विभागका सल्लाहकार संजीत खरेल, पर्यटन तथा नागरिक उड्डयन विभागका अतिरिक्त मुख्य सचिव सी.एस. राव साथै विभिन्न विभागका अधिकारी र सिक्किमको हितधारक टोली सहभागी रहेको छ। 

---